Bítlarnir af fingrum fram með Jóni Ólafssyni í Cavern Club í Liverpool 2.-5. desember

Skelltu þér með okkur í ógleymanlega 3ja nátta ferð til Liverpool dagana 2.-5. desember 2022, þar sem hápunkturinn er kvöldskemmtunin „Bítlarnir af fingrum fram í Cavern Club“ – sögustund í tónum og tali með Jóni Ólafssyni. 

Í ferðinni fögnum við 60 ára sögu þeirra John, Paul, George og Ringo, en sá síðastnefndi gekk til liðs við The Beatles árið 1962. Við kynnum okkur töfra tónlistar Bítlanna og söguslóðir fjórmenninganna, njótum lífs í mat og drykk og kíkjum aðeins í búðir í aðdraganda jólanna en miðborg Liverpool er afar hentug til slíks.

Aðalfararstjóri er Bítlavinurinn og hinn Nýdanski Jón Ólafsson

Tvö forfallasæti á kr. 157.800*
*Verð á mann m.v. gistingu í 2ja manna herb.

Tónlist Bítlanna ruddi nýjar brautir í dægurtónlist á sínum tíma. Slíkur er máttur tónlistar fjórmenninganna frá Liverpool að hún lætur engan ósnortinn meira en hálfri öld eftir að síðustu plötur Bítlanna komu út.

Fleiri ferðamenn koma til Liverpool á hverju ári til þess að kynna sér sögu og söguslóðir Bítlanna en til að fara á knattspyrnuleiki og eru þó tvö þekkt knattspyrnulið í borginni.

Jón Ólafsson, tónlistarmaður, þekkir tónlist Bítlanna eins og lófann á sér. Hann verður aðalfararstjóri okkar í þessari ferð og mun leiða þátttakendur í gegnum ótrúlegan feril fjórmenninganna í tali og tónum á ljúfri kvöldstund í hinum goðsagnakennda Cavern Club.

Þetta er einstakt tækifæri!

Sem borg á Liverpool sér stórmerkilega sögu, löngu fyrir tíma Bítlanna. Á tímum iðnbyltingarinnar varð Liverpool helsta útflutningshöfn Bretlands. Fyrir vikið varð Liverpool snemma vagga fjölmenningar. Liverpool var jafnframt á gullöld borgarinnar miðstöð farþegasiglinga yfir Atlantshafið.

Sterk tenging borgarinnar við Bandaríkin mótaði ekki aðeins sögu hennar að vissu leyti heldur voru þessi tengsl ekki síður uppspretta þeirra menningaráhrifa sem mótuðu m.a. feril Bítlanna.

Liverpool er einstök borg með sérstakan „Scouse-kúltur“ og nánast eigið tungumál. Liverpool er í dag ein vinsælasta ferðamannaborg Englands, annáluð fyrir fjörlegt skemmtanalíf, góða matsölustaði, fjölda frábærra verslana og hlýtt viðmót heimamanna.

Auk þess sem er innifalið í ferðinni bjóðum við þátttakendum upp á að bóka heimsókn í The Beatles Story (sögusafn Bítlanna) við Albert Dock og the British Music Experience, sem er skemmtilegt safn fyrir popp- og rokktónlist síðustu áratuga.

Innifalið í verði: Flug með Play til Liverpool, út  föstudaginn 2. desember og heim mánudaginn 5. desember • Full farangursheimild • Akstur á milli flugvallar og hótels • Gisting í 2ja manna herbergi með morgunverði í 3 nætur á Novotel, sem er 4* hótel í hjarta Liverpool-borgar • Magical Mystery Tour, tveggja tíma skoðunarferð um æskuslóðir þeirra John, Paul, George og Ringo, á sunnudeginum • Bítlarnir af fingrum fram með Jóni Ólafssyni í Cavern Club á sunnudeginum, þar sem hann fer í gegnum tónlist fjórmenninganna í tónum og tali í einkasal fyrir hópinn (The Cavern Lounge, þar sem Paul McCartney tróð m.a. upp 1999 og aftur 2018) 

Vinsamlega athugið!  Cavern Club er með 18 ára aldurstakmark á kvöldin. Á því eru ekki neinar undantekningar, jafnvel þótt um lokaðan viðburð sé að ræða eins og þennan.